|
|
|
|
Wie in Oober Bèiere in et jaor 1914 et eesjte Marottebal woort gehauwte, koume ènnige sjtamgaste oppe gedanke óm aan dat bal mit te doon ès `de twèllef ambachte en et darteende óngelök`. Sjoon verkleit en gemaskeijert, sjlouge ze de flikker wie noch nie. De ganse zaal sjtóng oppe kop. Et veil zoo in de sjmaak van de sjuurie, datse einen eesjte pries maakde. Wie dat zoo geit, ´t grupke woort ei klupke. Twee dènger hauwe ze zich veurgenómme: zichzèllef gout verammezeiere en Zitterd en et Zittesj vereinigingslaeve op alle gebied te hellepe en te sjteune. Netuurlik moosj der eine naam verzónne waere, maar zellefs nao lang euverlègke waor der nog niks oetgekómme. Zèf Bósj, dae et muig begoosj te waere, wol et draan gaeve en zach: `waat kan ós dat verdomme`. Dat waor midde in de roos. Nao gèt passe en maete kreeg de vereiniging de sjoone naam Ós Kan Niks Verdomme. Nao boetenoet en offesjeel woort der gewirk mit de aafkorting O.K.N.V.D. Ze wolle neeme veur de kop sjtoote, en ouch gein sjlaopende hónj wakker maake. Eesj moosjte ze in Zitterd maar èns weite wie en waat ze douge. (Sitaat oet: Woordenboek van het Sittards dialect van P.J.G. Schelberg). In de dreuge zoomer van '21 zoute veer - wie gewènd - bie Zef ónger de tent. Opèns vreeg eine: "Zouwe veer èns gèt maake in de Bloumekorso?" De korso waor gedach ès besjloet van de Börgerwach-feeste. 't Koum zoo wied, dat dao euver ein vergaadering woort gehawte in 't kaemerke van de Mam. Dao vergaaderde Zef Kals, Zef Sjörgesj, Zef Lezjöön, Piaer Gieze, Krit Gieze, Sjeng Waevesj, Lei Beurskes, Nol Deitere, Jim Jansse, Marteng Bitsj, Zef Wulms en - es sjteunend lid - Haarie Mastebrouk. Zef Kals maakde zich veurzitter, Zef Wulms woort penningmeister gemaak en veur de eesjte köste gouve alle leede twee-fieftig. Mastebrouk gouf teen guië.13 Juli weier vergaadere: waat maake? Dao koum niks oet de bös. 17 Juli veil 't besjloet: Ein boot oppe Roeibaan. Es gouwe penningmeister vroug Zef Wulms: "Wovan doon veer dat jònges?" "Wie komme veer aan de sente?" De sente haw veer doe nog neit, mae de klup haw hööre naam! 17Juli 1921: "Wo-Van"
(oet: "Club Wo-Van Zitterd 1921-1971" van
Zef Wulms baeter bekènd es d'n Tip-Top)
|
|
|
|
