Wie in Oober Bèiere in et jaor 1914 et eesjte Marottebal woort gehauwte, koume ènnige sjtamgaste oppe gedanke ôm aan dat bal mit te doon ès “de twèllef ambachte en et darteende ôngelök”.
Sjoon verkleit en gemaskeijert, sjlouge ze de flikker wie noch nie. De ganse zaal sjtông oppe kop. Et veil zoo in de sjmaak van de sjuurie, datse einen eesjte pries maakde. Wie dat zoo geit, ´t grupke woort ei klupke. Twee dènger hauwe ze zich veurgenômme: zichzèllef gout verammezeiere en Zitterd en et Zittesj vereinigingslaeve op alle gebied te hellepe en te sjteune. Netuurlik moosj der eine naam verzônne waere, maar zellefs nao lang euverlègke waor der nog niks oetgekômme. Zèf Bósj, dae et muig begoosj te waere, wol et draan gaeve en zach: “waat kan ôs dat verdomme”. Dat waor midde in de roos. Nao gèt passe en maete kreeg de vereiniging de sjoone naam Ôs Kan Niks Verdomme.
Nao boetenoet en offesjeel woort der gewirk mit de aafkorting O.K.N.V.D. Ze wolle neeme veur de kop sjtoote, en ouch gein sjlaopende hónj wakker maake. Eesj moosjte ze in Zitterd maar èns weite wie en waat ze douge.